ՆՈՐՈՒԹՅՈՒՆՆԵՐ:

2021 թվականի սեպտեմբերի 23-ին Հայաստանի, Վրաստանի, Ռուսաստանի և Արևելյան Եվրոպայի համար Հայ կաթողիկե եկեղեցու նախկին օրդինարիուշ Ռաֆայել արքեպիսկոպոս Մինասյանը

Սուրբ Սինոդի կողմից ընտրվեց Հայ կաթողիկե եկեղեցու նոր կաթողիկոս-պատրիարք և ընդունեց Ռաֆայել Պետրոս XXI անունը:
Լրացուցիչ տեղեկություններն այստեղ՝ Օրդինարիատ

Լույս է տեսել «Ավետիսի» 48-րդ համարը՝ 2021 թ․ աշուն: Խմբագրական խոսքում կարդում ենք․
Սիրելի՛ ընթերցողներ
Սեպտեմբերի 27-ին, մեկ տարի է անցել այն օրվանից, երբ Ադրբեջանը հարձակվեց Լեռնային Ղարաբաղում հայկական դիրքերի վրա և սկսվեց 44-օրյա պատերազմը, որին զոհ գնաց առնվազն 7000 զինվոր և խաղաղ բնակիչ, իսկ հազարավոր մարդիկ ստիպված եղան լքել պատերազմական գոտին և ապաստան գտնել Հայաստանում կամ արտերկրում: Ադրբեջանական կողմին ակտիվորեն աջակցում էր Թուրքիան՝ ինչպես տեխնիկայով, այնպես էլ զինվորական անձնակազմով: Այս տարվա հունիսին Թուրքիայի նախագահ Ռեջեփ Թայիփ Էրդողանն այցելեց Արցախի գրավյալ տարածքներ, Շուշի քաղաք և Ադրբեջանի հետ կնքեց դաշինքի նոր պայմանագիր: Այսպիսով, ըստ որոշ մեկնաբանների, Ադրբեջանը մտել է Թուրքիայի կողմից վասալացման ուղի: Մինչդեռ աշխարհը կարծես մոռացել է այս պատերազմի մասին: Որպես օրինակ կարելի է նշել Եվրո 2020-ի հանդիպումները, որոնք անցկացվեցին Բաքվում: Ֆուտբոլային հույզերը պետք է ծածկեին վերջին ագրեսիայի և զոհերի մասին հիշողությունը:
Բայց թե լեհահայերը և թե ամբողջ աշխարհում ապրող հայերը չեն մոռացել: Այս տարի, չնայած Հայաստանի անկախության 30-ամյակին, հիմնական թեման դեռևս պատերազմն է և դրա հետևանքները: Լեհաստանում տոնակատարության փոխարեն ծաղկեպսակներ ու մոմավառություններ էին: Պատերազմից տուժածներին աջակցելուն ուղղված բարեգործական ակցիաները դեռ շարունակվում են, օրինակ` նկարչական աճուրդները (էջ 14) կամ Հայաստանից երեխաների համար ուղևորությունները (էջ 9): Լեհահայերը նաև ցանկանում են հուշարձաններով ոգեկոչել զոհերի հիշատակը, այստեղից էլ` Բիալիստոկի նոր խաչքարը (էջ 2):
Մխիթարական է, որ վերջին եռամսյակում հիվանդության դեպքերի թիվը նվազեց,
և հնարավոր եղավ վերադառնալ քիչ թե շատ սովորական ապրելակերպի: Հայկական օրերը Գդանսկում (էջ 1) կամ եկեղեցական արարողությունները չէին կարող տեղի ունենալ լոքդաունի պայմաններում: Հետևաբար, հույս ունենք, որ հիվանդության հաջորդ՝ աշուն-ձմեռ ալիքն այնքան լուրջ չի լինի, որքան անցյալ տարի, և որ հաջորդ տարին կարելի կլինի համարել համաճարակից ազատ:
Խմբագրություն
Հրավիրում ենք ընթերցանության՝ Ավետիս

Okładka Lehahayer nr 7

Լեհաստանում հայկական մշակույթի հետազոտությունների կենտրոնի կողմից հրատարակվել է «Լեհահայեր» հայագիտական լրագրի 7-րդ համարը, խմբագիր՝ Անդժեյ Ա. Ժիեմբա: Համարն ընդգրկում է հետևյալ հոդվածները.
– Մարչին Լուկաշ Մայեվսկու «Հայերը Զամոշչում՝ քաղաքի գոյության առաջին երեք տասնամյակների ընթացքում (1580-1610)»,
– Անդժեյ Գլինսկու «Արհեստների և առևտրի կազմակերպումը Ստանիսլավովի հայկական համայնքում XVII և XVIII դդ․»,
– Ֆրանչիշեկ Վասիլի «Ով ինչով է խաղում և ինչով է ապրում»: XVIII դարեվերջին Կուտիի հայերի մասնագիտությունները այլ ազգերի համեմատությամբ»,
– Անդժեյ Ա. Ժիեմբայի «Հայերին իրենց հայրենիք վերադարձնելու գաղափարը՝ Ռոբերտ Բոգդանովիչի 1877 և 1884 թթ․ հուշերի լույսի ներքո»,
– Յակուբ Օշեցկու «Լեհ-հայկական ընկերակցությունը Լվովում (1920-1922)»
– Թոմաշ Քշիժովսկու «Հայոց լեզվի դասավանդումը Լվովի համալսարանում 1904-1939 թթ․»,
– Պետրա Կոստալովայի «Չեխ-հայկական հարաբերությունները: Համառոտ պատմական ակնարկ»,
– Արմեն Չեչոյանի «Եվգենի Գուրինով, «Անիվ» հայագիտական հետազոտությունների զարգացման և աջակցության հիմնադրամ․ գործունեության ակնարկ»,
– Մարիա Օհանովիչ-Տարասյուկի «Հայկական ժառանգության պաշտպանությունը Լեհահայերի մշակույթի և ժառանգության հիմնադրամի գործունեությունում»,
– «Վարդան Ռ․ Գրիգորյան (1929-2019): Ի հիշատակ»,
– Արամ Գրիգորյանի «Վարդան Ռուբենովիչ Գրիգորյան (1929-2019)։ Պատմաբան, հայագետ, լրագրող, հին հայկական ձեռագրերի հավաքող»,
– Անդժեյ Պիսովիչի «Վարդան Գրիգորյանի մասին հուշեր»։
Հրապարակումը լույս է տեսել Լանցկորոնսկիների հիմնադրամի դրամաշնորհի և Կրակովում Յագելոնյան համալսարանի պատմության ֆակուլտետի կանոնադրական գործունեության համար հատկացված միջոցների շնորհիվ:

Ուրախ ենք տեղեկացնել, որ «Przegląd Wschodni»-ի մրցանակաբաշխության հանձնաժողովի որոշմամբ«Տեղական աշխատանքներ» անվանակարգում 2020 թ. մրցանակը շնորհվել է
«Հայ կաթողիկե ծիսակարգով Լվովի արքեպիսկոպոսությունը 1902-1938 թթ․» գրքին, հեղինակ՝ Թոմաշ Քշիժովսկի։
Այս հրաշալի լուրը ստացել ենք հրատարակչից՝ Կրակովի ակադեմիական գրախանութից:
Լույս է տեսել դոկտոր Թոմաշ Քշիժովսկու համապարփակ հրատարակությունը՝ «Հայ կաթողիկե ծիսակարգով Լվովի արքեպիսկոպոսությունը 1902-1938 թթ․»: Ինչպես այն ներկայացնում է հաբ․դոկտոր Անդժեյ Ա․ Ժիեմբան․ «Լեհաստանի Հայ կաթողիկե եկեղեցին արքեպիսկոպոս Յուզեֆ Թեոդորովիչի գլխավորությամբ 20-րդ դարի առաջին չորս տասնամյակների ընթացքում վերածնունդ ապրեց: Իր պատմության մեջ առաջին լրատվամիջոցները (ամսագրեր, ռադիոհեռարձակումներ), աշխարհիկ հավատացյալների կազմակերպությունների վերածնունդը ժամանակակից ձևով, հոյակապ տաճար, որտեղ սրբությունները ձեռք են բերել արտակարգ գեղարվեստական տեսք, այլ երկրների հայ կաթողիկե մայր համայնքի հետ կապերի վերականգնում, առաքելության ծրագրերը և առաքելության տեսլականը լեհական հասարակության մեջ և Հայաստանի հանդեպ. սրանք անհերքելի ձեռքբերումներ են, որոնք կարող են բարիք բերել տարբեր հարթություններում՝ ազգային հայկական և կրոնական, կաթոլիկ և էկումենիկ: Ինչպես գիտենք, դա տեղի չունեցավ այն կոտորածի պատճառով, որին այս Եկեղեցին և նրա հավատացյալները ենթարկվեցին Երկրորդ համաշխարհային պատերազմի ընթացքում և դրանից հետո: Այս նվաճումները սովորաբար վերագրվում էին եպիսկոպոսին, որը մեծ անհատականություն էր և հեղինակություն ուներ կրոնական սահմաններից դուրս: Եվ դա անկասկած իր կողմից նորոգված Եկեղեցին էր, բայց ոչ միայնակ: Թոմաշ Քշիժովսկու գիրքը լրացնում է մեր գիտելիքները վերածննդի աղբյուրների և ուղղությունների վերաբերյալ՝ ցույց տալով, թե ինչպես էին գործում այս Եկեղեցու կառույցները, նրա հաստատությունները, քահանաները, կանացի կարգը և հավատացյալները: Հեղինակը մեծ հմտություն է ցուցաբերել աղբյուրները բացահայտելու և վերլուծելու հարցում: Նա ստեղծել է հիմնավոր, տվյալներով հարուստ, լավ շարադրված մենագրություն: Դա առեղծվածայինը մարդկայինի հետ կապող շինարարության գործընթացի ճշգրիտ պատմական վերակազմություն է, որում երկրորդի թեման ընդհատել է դաժան Պատմությունը:
Կրակովի Լեհաստանում հայկական մշակույթի հետազոտությունների կենտրոնի կողմից հրատարակվել է ավելի քան 700 էջանոց հարուստ պատկերազարդ գիրք՝ որպես «Լեհահայերի գրադարան» շարքի երրորդ հատոր: Հրատարակությունը տպագրության է պատրաստել Ակադեմիական գրախանութը, իսկ համաֆինանսավորվել է Լեհահայերի մշակույթի և ժառանգության հիմնադրամի կողմից՝ Ներքին գործերի և ադմինիստրացիայի նախարարի դրամաշնորհից: Գիրքը ձեռք բերելու համար խնդրում ենք կապվել Ակադեմիական գրախանութի հետ՝ https://akademicka.com.pl/.

Լույս է տեսել «Ավետիսի» 46-րդ գարնանային համարը Խմբագրական խոսքում կարդում ենք.
Հարգելի ընթերցողներ,
Պատերազմն Արցախում ավարտվեց նոյեմբերյան զինադադարով, բայց ոչ բոլորն են ընդունում դրա դրույթները: Բողոքի ցույցերը Հայաստանում շարունակվում են մինչ օրս, իսկ ցուցարարներն ու բանակի մի մասը պահանջում են վարչապետ Նիկոլ Փաշինյանի հրաժարականը և զինադադարի վերանայում: Սակայն պատերազմը՝ բացի տարածքների կորստից, զինվորների և խաղաղ բնակիչների մահն է, հազարավոր վիրավորներ և փախստականներ: Պատերազմի որոշ հետևանքների մասին գրում ենք 1-3 էջերում: Իսկ 7-րդ էջում Կոնրադ Շեկիրսկին Ղարաբաղին հարակից մեկ շրջանի օրինակով նկարագրում է, թե որքան արագ կարող է ոչնչացվել այն, ինչ հայերը մեծ ջանքերով կառուցել են նախորդ պատերազմից հետո:
Լեհաստանում, համաճարակային պայմաններում, համայնքների ավանդական հանդիպումներ չեն անցկացվում, և սուրբ պատարագները սովորաբար մատուցվում են առանց հավատացյալների մասնակցության և հեռարձակվում են առցանց: Այնուամենայնիվ, մեկ իրադարձություն չափազանց կարևոր է մեզ համար. դա մեր հիմնադրամի համար նոր գրասենյակ ձեռք բերելու հարցում հաջողությունն է: Հիանալի վայրում գտնվող մեծ տարածքը մեզ հնարավորություն կտա ավելի լավ պաշտպանել հավաքածուները և հետագայում ավելի շատ մասսայականացնող միջոցառումներ կազմակերպել: Այս առիթով նաև ուզում ենք հիշեցնել, թե հիմնադրամի թիմը ինչի է հասել և ինչ առաջադրանքներ է իրականացրել անցյալ տարի:
Իրադարձությունների բացակայության պատճառով կենտրոնանում ենք պատմության և ավանդույթի վրա, ինչպես նաև հիշում ենք անցյալ տարվա հայկական հոբելյանները:
Հրավիրում ենք ընթերցելու: Բեռնել

Արտաքին գործերի և Ազգային պաշտպանության նախարարությունների, Ռազմավարական պաշարների պետական գործակալության համատեղ ջանքերի շնորհիվ ապրիլի 15-ին Կրակովի Բալիցե օդանավակայանից օդանավ մեկնեց Հայաստան՝ տանելով մարդասիրական օգնություն:
Այդ մասին տեղեկացրեց Արտաքին գործերի փոխնախարար Պավել Յաբլոնսկին՝ Զարգացման համագործակցության տարածքային համակարգման պատասխանատուն․
– Այսօր Լեհաստանը կրկին կատարում է իր պարտականությունը հումանիտար ճգնաժամից տուժած մարդկանց առջև։ Ինչով կարող ենք կիսվում ենք մի երկրի հետ, որը հայտնվել է բարդ իրավիճակում՝ կապված Արցախյան հակամարտության հետևանքների հետ: Արձագանքելով ՀՀ կառավարության կոչին՝ զինված հակամարտությունից տուժած խաղաղ բնակչությանը տրամադրում ենք ամենահրատապ օգնությունը՝ անկողնային պարագաներ, ծածկոցներ, սրբիչներ, էլեկտրոնային ջերմաչափեր, ախտահանիչ հեղուկ, ինչպես նաև ճնշման սարքեր…
Լեհաստանը համակարգված կերպով օգնություն է տրամադրում հումանիտար ճգնաժամից տուժած երկրներում ապրող մարդկանց, վերջերս աջակցել է Բելառուսին և Ուկրաինային, Մոլդովային, Ղազախստանին և Ուզբեկստանին: Նման օգնություն են ստացել նաև Ղրղըզստանը, Տաջիկստանը և Եթովպիան, Սուդանը՝ ջրհեղեղի հետ կապված, ինչպես նաև Լիբանանը՝ Բեյրութի նավահանգստում 2020 թ․-ի օգոստոսին տեղի ունեցած պայթյունից հետո:

Վոլովի բենեդիկտյան քույրերը՝ Լվովի հայ բենեդիկտյան քույրերի ժառանգները, սույն թվականի հունվարի 10-ին Լեհահայոց մշակույթի և ժառանգության հիմնադրամին նվիրեցին հերթական չափազանց արժեքավոր նվերը` Լվովի բենեդիկտյան քույրերի մնացած 4 դիմանկարները և «Աստծամայրը մանկան հետ» կտավը:
Վերադաս քույրեր՝ Մարիաննա Ներսեսևիչովնայի, Աննա Լյուդվիկա Քշիշտոֆովիչովնայի, Կայետանա Ռոզալիա Սարկիսևիչովնայի և Յանինա Ալոյզա Յանովիչովնայի դիմանկարները: Այս չորս կտավները լրացնում են Լվովի հայ բենեդիկտյան քույրերի առկա և պահպանված 11 դիմանկարների հավաքածուն: Նախկինում Վոլովի բենեդիկտյան քույրերից ստացել ենք 7 կտավ, որոնք արդեն անցել են մասնագիտական հետազոտություններ և կոնսերվացվել են, ինչի շնորհիվ վերգտել են նախկին շքեղությունը՝ պահպանելով սակայն ժամանակի բոլոր հետքերը: Այս դիմանկարների նվիրատվությունը Հիմնադրամի համար պատմական իրադարձություն է. ստացել ենք անցյալ դարաշրջանի ամենաթանկարժեք նմուշներից մեկը` հայ բենեդիկտյան քույրերի միաբանության հիշատակը, և միևնույն ժամանակ կտավների յուրօրինակ հավաքածու, որը հնարավորություն է տալիս դիտարկելու տվյալ ժամանակի նկարչության տենդենցները:

Պայմանագիրը և փոխանցման արձանագրությունը ստորագրեցին՝ վանքի վերադաս քույր Մարիա Դանուտա Տրիբուլան և Հիմնադրամի կողմից՝ խորհրդի նախագահ Մարիա Օհանովիչ-Տարասյուկը, նկարների փոխանցման գործողությանը մասնակցում էր վանքի հաճախակի այցելու՝ Ռոմանա Օբրոցկան: Այցելության ընթացքում քույր Մարիան մեզ ցույց տվեց մի գեղեցիկ սրբատուփ` Սուրբ Հռիփսիմեի և Սուրբ Բենեդիկտի մասունքներով, և օրիգինալ ասա, որը կարելի է տեսնել քույրերի վերջին երեք դիմանկարներում: Ունեցանք նաև հնարավորություն այցելելու վանքի մատուռ:

Այսպիսով, ցանկանում ենք մեկ անգամ ևս շնորհակալություն հայտնել Բենեդիկտյան քույրերին Հիմնադրամին ընծայած առատաձեռն նվերի համար, այս որոշման շնորհիվ Բենեդիկտյան միաբանության պատմության համար անգնահատելի այս դիմանկարները կփրկվեն ժամանակի հետևանքով առաջացած դեգրադացիայից և կվերականգնեն իրենց նախկին շքեղությունը:

Այս տարվանից Հիմնադրամում շատ փոփոխություններ են սպասվում, հրաժարվում ենք նախկին բանկի ծառայություններից, մեր ակտուալ հաշվեհամարն է միայն՝
BNP Paribas բանկում բացված հաշվեհամարը, որին կարող եք փոխանցել դրամական հատկացումներ կանոնադրական նպատակներով.
35 1600 1462 1890 8960 3000 0001
Մյուս լուրջ փոփոխությունն այն է, որ գործունեության 15-րդ տարում Հիմնադրամը գործելու է այլ հասցեում, մենք տեղափոխվում ենք նոր տարածք, որը համապատասխանում է մեր կարիքներին և ակնկալիքներին:
Մեր նոր հասցեն է՝ փող. Շվենտոյերսկա 12, 00-236 Վարշավա, այն զբոսաշրջային երթուղիներին շատ մոտ է՝ Նովե Միաստո, Ֆրետի փողոցից ընդամենը 150 մ հեռավորությամբ:

Տարածքը գտնվում է առաջին հարկում՝ մուտքն անմիջապես փողոցից է: Մեր տրամադրության տակ գտնվող տարածքը թույլ կտա այն մասամբ հատկացնել մեր թանգարանային և արխիվային հավաքածուների հանրային ցուցադրմանը: Այս հիանալի ծրագրերի իրականացումը կախված է դրա համար անհրաժեշտ միջոցների ձեռքբերումից։ Մենք լավատես ենք և հուսով ենք, որ ամեն ինչ հաջող կընթանա ու մի քանի ամիս անց կկարողանանք հյուրընկալել՝ մեր ընկերներին, աջակիցներին, մեր հավաքածուներով հետաքրքրված հյուրերին և Վարշավա այցելող զբոսաշրջիկներին:

Հայկական բարեգործական ընդհանուր միությունը (ՀԲԸՄ) հայկական non-profit (շահույթ չհետապնդող) կազմակերպություն է, որը հիմնադրվել է 1906 թվականին Եգիպտոսի Կահիրե քաղաքում: Երկրորդ համաշխարհային պատերազմի գալուստով ՀԲԸՄ-ի նստավայրը տեղափոխվեց Նյու Յորք: ՀԲԸՄ-ի եվրոպական գրասենյակը գտնվում է Բրյուսելում:
Վերջերս այս կազմակերպությունը հատկապես ակտիվ էր օգոստոսին Բեյրութում տեղի ունեցած պայթյունի զոհերին օգնելու հարցում: Անցյալ ամիս Բեյրութի նավահանգստում տեղի ունեցած աղետալի պայթյունը խլեց բազմաթիվ անմեղ կանանց, տղամարդկանց և երեխաների կյանքեր, իսկ բազմաթիվ մարդիկ էլ վիրավորվեցին: Այն ոչնչացրեց բազմաթիվ բնակելի շենքեր, ինչպես նաև շատ ձեռնարկություններ: ՀԲԸՄ-ի երկարամյա փորձը՝ մարդասիրական օգնություն տրամադրելու գործում, օգնեց անհապաղ օգնություն կազմակերպել Լիբանանի համար, որտեղ, ինչպես գիտենք, ապրում է մեծ հայկական համայնք:
Ստեղծվեց ՀԲԸՄ 2020 Լիբանանի օգնության ֆոնդը՝ Հազարավորներին օգնելու համար: Աշխատակազմն ու կամավորներն աշխատում են շուրջօրյա ռեժիմով, առավելագույնս տուժած շրջաններում հազարավոր մարդկանց շտապ օգնություն ցույց տալու համար: Կամավորները մոբիլիզացվեցին և ստեղծվեցին առաջադրանքային խմբեր: Գործում էին նաև՝ թեժ գիծ, տան մաքրում, վերանորոգում, վնասի գնահատում, ֆինանսավորում, ավելի քան 500 տների վերակառուցում (վերակառուցումն արդեն սկսված է): Սննդամթերքով աջակցության ծրագրեր՝ ամսական սննդի պաշարներ ավելի քան 5000 հայերի համար և սննդամթերքի պատրաստում ՝ այլազգիներին (ոչ հայերին) օգնելու համար: Բժշկական օգնություն և խորհրդատվություն՝ հայերին և որոշ այլազգիներին բժշկական օգնություն ցուցաբերող կլինիկաներ, աջակցության ծրագրեր, երիտասարդների հոգեբանական խորհրդատվություն:
ՀԲԸՄ՝ վազք Լիբանանի համար
Լիբանանին օգնության ակցիայի շրջանակներում՝ ՀԲԸՄ-ն առաջարկել է նաև սույն թվի հոկտեմբերի 25-ին կազմակերպել 10 կմ գլոբալ վազք:
Այս միջոցառման հիմնական նախադրյալները հետևյալն են.
AGBU 10 K GLOBAL RUN (10 կմ համընդհանուր վազք)՝ ՄԱՐԿԵՏԻՆԳ ԵՎ ԳՈՎԱԶԴ
1-ին փուլ . Կադրերի հավաքագրման արշավ. սկսեք ձեռք բերել նվիրատվությունների անհատական ցանց
2-րդ փուլ . Նվիրատվություններ. տեղական նվիրատուներ, որոնք աջակցում են տեղական վազորդներն (fundraisers): Գործընկերները խրախուսում են իրենց վազորդներին՝ ակտիվորեն միջոցներ հայթայթել ամբողջ այդ ժամանակահատվածում և երկրաբգել իրենց ջանքերի համար: Գրանցված վազորդները (fundraisers) մասնակցում են 10 կմ վազքին և դրամահավաք արշավին՝ գրանցվելով առցանց և միանալով ՀԲԸՄ-ի թիմին:
ԴՐԱՄԱՀԱՎԱՔ. Վազորդները (fundraisers) ստեղծում են անձնական հանգանակության կայք և հրավիրում են ընկերներին, ընտանիքին և գործընկերներին՝ Լիբանանին օգնության համար նվիրաբերություն ստանալու համար: Տեղադրում են իրենց նվաճումների վերաբերյալ նորություններ, օգտագործում են այլ եղանակներ ավելի շատ նվիրատվություն ստանալու նպատակով և գովազդում իրենց անձնական և թիմային առաջընթացը:
ՎԱԶՔ. Վազորդներին առաջարկվում է 2020 թվականի հոկտեմբերին ինքնուրույն վազել /քայլել (քայլարշավ) իրենց տեմպով, աշխարհի որ կետում էլ որ լինեն:
Գործողության ավարտը. Հոկտեմբերի 25-ին, վազքի ավարտից հետո, հրավիրում ենք բոլորին մասնակցել արարողությանը:
Կազմակերպիչները առաջարկում են նաև լրատվամիջոցներում օգտագործել առաջարկվող հաղորդագրությունների այնպիսի տեքստեր, ինչպիսիք են.
Առաջարկ 1. Պետք է օգնենք միջոցներ հայթայթել Լիբանանի համար: Յուրաքանչյուրը կարող է մասնակցել: Քայլեք կամ վազեք: Գրանցվեք՝ կարիքավորներին օգնելու համար:
Առաջարկ 2. Օգնեք մեզ կերակրել առավել կարիքավորներին: Դուք կարող եք միջոցներ հայթայթել՝ միանալով 10կմ գլոբալ վազքինին: Դա հեշտ է՝ քայլեք կամ վազեք: Յուրաքանչյուրը կարող է մասնակցել:
Առաջարկ 3. Քայլեք կամ վազեք՝ Լիբանանին օգնության միջոցներ հայթայթելու համար: Կարող եք ինչ-որ բան փոխել՝ միանալով մեր 10 կմ գլոբալ վազքին:
Ինչ վերաբերում է միջոցառման ընթացքում օգտագործված պաստառներին կամ դրոշներին, կազմակերպիչներն առաջարկում են հատուկ գրաֆիկական լուծումներ, որոնք առկա են ՀԲԸՄ Բրյուսելի կայքում:
Ընդհանրապես, միջոցառումը մանրամասն նկարագրվում է ինտերնետում, և եթե պատրաստ եք մասնակցել, ապա պետք է ուղղորդվեք այնտեղ տեղադրված մանրամասն տեղեկատվությամբ:

TVPGdansk_panoramaGdansk_min_J_Selin
Անցյալ տարվա հունիսի 2-ին հրդեհ էր բռնկվել Սբ. Պողոս և Պետրոս եկեղեցու ձեղնահարկում: Բարեբախտաբար, կրակը չէր հասել եկեղեցու հիմնական մաս, սակայն լրջորեն վնասել էր տանիքի արևելյան հատվածը: Գդանսկի ամենահին եկեղեցիներին անհապաղ վերանորոգման կարիք ուներ: Օգնության եկան Գդանսկի իշխանությունները և Մշակույթի և ազգային ժառանգության նախարարությունը: Ներկայումս վերանորոգումն ավարտվում է, և ինչպես հաղորդվել է TV Gdańsk-ի «Պանորամա» հաղորդաշարի սեպտեմբերի 26-ի թողարկմանը, եկեղեցի էր այցելել Մշակույթի և ազգային ժառանգության փոխնախարար Յարոսլավ Սելինը, որն այս ցավալի դեպքից անմիջապես հետո տեղում էր նախարար Պիոտր Գլինսկու հետ միասին:
TVP3 Gdańsk կայքում հայտնված նյութի վերնագիրն է՝ «Սբ. Պողոս և Պետրոս եկեղեցին հրդեհից հետո վերգտնում է իր փայլը»: